ദോഹ: ലോകപ്രശസ്ത ടെക് സംഗമമായ വെബ് സമ്മിറ്റ് ഖത്തറിന്റെ മൂന്നാം പതിപ്പിലെ മുഴുവൻ ടിക്കറ്റുകളും വിറ്റുതീർന്നു. പലസ്തീനിയൻ ആപ്പായ 'അപ്‌സ്ക്രോൾഡ്' (Upscrolled) സ്ഥാപകൻ ഇസാം ഹിജാസി ഉദ്ഘാടന രാത്രിയിൽ പ്രഭാഷകനായി എത്തുമെന്ന പ്രഖ്യാപനത്തിന് പിന്നാലെയാണ് ടിക്കറ്റ് വിൽപ്പനയിൽ വൻ കുതിച്ചുചാട്ടമുണ്ടായത്.
അമേരിക്കയിലും ആഗോളതലത്തിലും നിലവിൽ ഒന്നാം സ്ഥാനത്തുള്ള ആപ്പാണ് അപ്‌സ്ക്രോൾഡ്. ബിഗ് ടെക് കമ്പനികളുടെ സെൻസർഷിപ്പിനും അൽഗോരിതം നിയന്ത്രണങ്ങൾക്കും എതിരെ പ്രവർത്തിക്കുന്ന ഈ പ്ലാറ്റ്‌ഫോമിന് ഒരാഴ്ചയ്ക്കിടെ 10 ലക്ഷത്തിലധികം ഉപഭോക്താക്കളെയാണ് ലഭിച്ചത്. ഐബിഎം, ഒറാക്കിൾ തുടങ്ങിയ പ്രമുഖ കമ്പനികളിലെ ദീർഘകാല പ്രവൃത്തിപരിചയത്തിന് ശേഷം ഇസാം ഹിജാസി നടത്തുന്ന ആദ്യ പൊതുവേദിയാകും ഞായറാഴ്ച ദോഹയിൽ നടക്കുക.
30,000-ത്തിലധികം ആളുകൾ പങ്കെടുക്കുന്ന ഇത്തവണത്തെ സമ്മിറ്റിൽ 1,600 സ്റ്റാർട്ടപ്പുകളും 900 നിക്ഷേപകരും എത്തും. ഖത്തർ ഫൗണ്ടേഷൻ ചെയർപേഴ്സൺ ഷെയ്ഖ മൗസ ബിൻത് നാസർ, ഫെയ്‌സ്ബുക്ക് സഹസ്ഥാപകൻ എഡ്വേർഡോ സാവെറിൻ, സാമ്പത്തിക ശാസ്ത്രജ്ഞൻ യാനിസ് വരൂഫാക്കിസ് തുടങ്ങി വൻനിര പ്രഭാഷകരും പരിപാടിയിൽ അണിനിരക്കും. 2024-ൽ 15,000 പേർ പങ്കെടുത്ത സ്ഥാനത്ത് നിന്നാണ് മൂന്നാം വർഷം സമ്മിറ്റ് ഇരട്ടി വളർച്ച കൈവരിച്ചിരിക്കുന്നത്.
